شاب زى العسل..خفيف الظل..ذكى..احب اتكلم معاه عن اى حاجة وكل حاجة..
بعد أن عرجنا على أحوال الاهلى ولماذا يفوز دائما وأحوال الزمالك ولماذا ينهزم كثيرا...ومنتخب مصر ولماذا لا يلعب الكرة كبقية خلق الله..وابراهيم عيسى السوبر مان سبب كل بلاوى مصر السابقة والحالية واللاحقة
والحب وسنينه وهل الواحد ممكن يحب مرتين ولا هى مرة واحدة والباقى تهيؤات..وعلى رأى سى حسنين الجاسمى"ما الحب الا للحبيب الاول" والريس صاحب الحكمة والبصيرة النافذة يا ترى بيعرف ينام ولا بيجيله كوابيس من تقل العشا؟!
حكالى حكاية ظريفة ولطيفة ومبتحطش روج
لما كان هو كسلى وبيعمل الحاجة فى الوقت الضايع ..ان عملها...فضل يأجل فى التربية العسكرية لحد سنة رابعةوقرر مرغما انو يعملها
فى مرة من ذات المرات(والعهدة على الراوى)..واقفين فى الطابور صفا وانتباه وتعظيم سلام ريقه نشف بمنتهى البراءة طلع لبانة تجرى ريقه ...شافه الباشا...وبذكر كثير لسيرة الأم وأفعالها المشينة..وأصواتا أكثر صادرة من الأنف مع فتح الفم وأخذ نفس قصير.....كان لأصبع اليد الوسطى دور كبير فى الأمر
أمره الباشا انو يعمل خمسمية ضغط...نهار أسود
أنشغل الباشا فى شرحة لدبانة السلاح ..فوت هو حتة بخمسة للعسكرى المراقب له وعدى الموضوع
وفى مرة تانية(وتظل العهدة على الراوى)..الموبايل بتاعه رن بيبص يشوف مين لمحه الباشا...مش عارف الباشا ده نظره جامد اوى المدرج مليان طلبة اشى طب على صيدلة على تجارة على غيره..صحيح باشا.(انا اللى بقول)......وبذكر كثير لسيرة الأم....مش عارف الباشا ليه دايما بيشتم الام...هو الأب ملوش نفس؟!..ويمكن يكون نوع قهر أخربيطلعه فى العيال...تمارسه أم اخرى هى أم اولاده(انا اللى بقول)..؟
أمره الباشا انو يوقف فاردا ذراعيه على اقصاهما ماسكا كشكوله...وبأن يقف على مشط رجله....ثم أمر العسكرى بأن يضع الموبايل تحت كعبه
نص ساعة على هذا الوضع الى أن عفا عنه الباشا على جريمته الشنعاء التى ارتكبها
مروح الولد(ومازالت العهدة على الراوى)..كل يوم سواق الميكروباز بيركب اربعة فى الكرسى..قاله تلاتة بس وتعالى بص...قاله مش عاجبك انظل يا استاظ
قامت خناقة طلع منها السواق سليم ولله الحمد بغض النظر عن بعض الكسور والرضوض والكثير من الدماء
أخر يوم فى التربيةالعسكرية(ولا تنسى أن العهدة على الراوى)..؟
جه الباشا الكبير ..أكبر من الباشا الاولانى
قال ياللا يا شباب اللى عاوز يقول حاجة يقولها
العيال طافحين قاموا وكان الكلام من نوعية
يا باشا حضرتك بعد اذنك انتو فشلة(جمع فاشل) الثانوية العامة
يا باشا سيادتك انتوا مفيش حد فيكم فى مكانه الصح
يا باشا انتو اللى بيتعمل فيكوا بتطلعوه علينا هنا وبعدين فى الجيش..ربنا يحفظنا
وقام طالب أخر متحمس نوعا ما نازعا صفة الرجولة عن كل الباشوات مدللا بمكانتهم المرموقة فى منازلهم
كان رد الباشا عملى جدا....ياللا يا شباب باقى اليوم(خمس ساعات) طابور
لا تعليق(أنا اللى بقول)..........
No comments:
Post a Comment